كنت قاعد باتكلم مع يوسف وبشرحله حديث، فلما قلت قال رسول الله فهو رد بشكل تلقائي وقال ﷺ، فقطعت كلامي وسألته
– يعني إيه يا يوسف صلى الله عليه وسلم ؟
سكت شوية يفكر فسألته
– طيب هجيبلك السؤال بشكل تاني ، هو ربنا بيصلي ؟!
بعد تفكير قال بتردد
– أكيد لأ، هو ربنا هيصلي لمين !
– طيب ممتاز جداً، وده يرجعنا لأصل السؤال ، يعني إيه ﷺ
أنا هقولك
بص يا يوسف، الصلاة في اللغة معناها ” الدعاء ” ، والصلاة في الشرع معناها العبادة ، إللي هى الصلوات إللي بنصليها
لو ركزت شوية في الصلاة هتلاقيها عبارة عن مجموعة من الأدعية أصلا
لما بنبدأ الصلاة بنقول ” الله أكبر ” يعني بنبدأ الصلاة بتعظيم الله سبحانه ، ولو ركزت في سورة الفاتحة هتلاقيها أصلاً دعاء
في نصفها الأول بنعظم ونمجد الله سبحانه وفي النصف الآخر بندعي لنفسنا ، وفي كل كلامنا في الصلاة عبارة عن تمجيد لله ودعاء لأنفسنا بالخير والمغفرة … صح ؟
– صح
يعني صلاة العباد _ إحنا والملائكة يعني_ هى عبارة عن دعاء لله سبحانه ، يعني بنطلب من الله سبحانه الخير … ممكن تقول صلاة العبد إلى الرب محل طلب
يعني بتطلب من الله ما تريد أو تسأله المغفرة
طيب صلاة الرب على العبد محل إيه ؟
صلاة الرب على العبد محل إستجابة يا يوسف
يعني صلاة الله على العبد، معناها إستجابة دعوة ومغفرة للذنوب ورفع للدرجات
فلما بتقول ” اللهم صل على محمد ” معناها
” اللهم أثن عليه في الملأ الأعلى وارفع درجاته في الجنة … وهكذا “
والدليل على ده هو قول الله سبحانه وتعالى
” خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِمْ بِهَا وَصَلِّ عَلَيْهِمْ إِنَّ صَلاتَكَ سَكَنٌ لَهُمْ ”
يعني ربنا سبحانه بيقول لسيدنا محمد أن يدعو لهم ، فمعنى الصلاة هنا الدعاء بنص الأية
وفي حديث قال رسول الله ﷺ
” إن الملائكة تصلي على أحدكم ما دام في مصلاه الذي صلى فيه ما لم يحدث ”
يعني أن الملائكة تطلب المغفرة للعبد .
يبقى الصلاة من العبد إلى الرب محل إيه ؟
– محل طلب
– وصلاة الرب على العبد محل إيه ؟
– محل إستجابة
– ممتاز ، نرجع لكلامنا بقى … قال رسول الله
– صلى الله عليه وسلم .
