– ربنا قال في سورة ص: ﴿وَلَاتَ حِينَ مَنَاص﴾ يعني إيه؟
– تعالى أشرحلك.
في أول سورة ص
ربنا سبحانه بيخاطب كفار قريش
اللي أصرّوا على الشرك بالله،
وكانوا فاكرين إنهم أقوياء،
واغترّوا بالمال والقوة اللي عندهم.
فربنا سبحانه ضرب لهم مثل بأقوام كتير جُم قبلهم،
كانوا برضه فاكرين إنهم أقوياء،
وإن الله مش هيعذبهم…
بالظبط زي ما كفار قريش كانوا فاكرين.
لكن لما جه وقت العذاب،
وشافوا بأعينهم إن اللي الرسول ﷺ حذّرهم منه حق،
صرخوا، وبكوا، وطلبوا من الله المغفرة…
لكن بعد فوات الأوان.
علشان كده ربنا وصف حالهم بقوله:
﴿وَلَاتَ حِينَ مَنَاص﴾
– يعني إيه الكلمات دي؟
لات: أداة مبالغة في النفي
حين: يعني الوقت أو الزمان
مَناص: يعني الهروب أو الفرار
يعني ربنا سبحانه بيقول لهم:
الرسول جائكم بالحق، وحذّركم من العذاب،
وقال لكم توبوا…
ودلوقتي بعد ما العذاب جه، عايزين تتوبوا؟!
خلاص… فات الوقت.
مفيش هروب، ولا رجوع، ولا فرصة تاني.
﴿وَلَاتَ حِينَ مَنَاص﴾
يعني:
الوقت اللي كان ينفع فيه الهروب أو الرجوع خلص.
وزي ما الآية دي كانت إنذار لكفار قريش،
فهي كمان إنذار لينا ولكل إنسان عايش في الدنيا.
اعرف دايمًا إن:
باب التوبة مفتوح، والله غفور رحيم،
ويقـبل توبتك حتى لو فاضل لك يوم واحد في الدنيا.
لكن إوعى تأجّل وتقول: بكرة أتوب…
لأن ببساطة ممكن بكرة ما ييجيش.
وساعتها الإنسان يبكي، ويندم
ويتمنى لو يرجع الدنيا علشان يتوب…
لكن هيكون خلاص:
﴿وَلَاتَ حِينَ مَنَاص﴾ وقت التوبة انتهى.
