علمني أبى..يعني إيه قُلْ أَتُعَلِّمُونَ اللَّهَ بِدِينِكُمْ؟

كتبت / عزه السيد

علمني أبى

– ربنا قال في سورة الحجرات:
﴿قُلْ أَتُعَلِّمُونَ اللَّهَ بِدِينِكُمْ
وَاللَّهُ يَعْلَمُ مَا فِي السَّمَاوَاتِ وَمَا فِي الْأَرْضِ
وَاللَّهُ بِكُلِّ شَيْءٍ عَلِيمٌ﴾

– يعني إيه قُلْ أَتُعَلِّمُونَ اللَّهَ بِدِينِكُمْ؟

– خلّيني أحكيلك القصة.

في زمن النبي ﷺ
جت جماعة من الأعراب (يعني من أهل البادية) إلى المدينة.

وقالوا للنبي ﷺ: إحنا آمنا من غير ما نحاربك،
وما وقفناش ضدك زي غيرنا…
ومن طريقة كلامهم كأنهم بيمنوا على النبي بإسلامهم
لكن الحقيقة إن الإيمان ما كانش استقر في قلوبهم لسه.

فربنا ردّ عليهم بالآية دي.
﴿قُلْ أَتُعَلِّمُونَ اللَّهَ بِدِينِكُمْ﴾

يعني:
هو أنتم جايين تقولوا لربنا إنكم مؤمنين…
وكأن ربنا مش عارف؟
الله يعلم ما في القلوب قبل ما تنطق الألسنة.

وبعدين قال:
﴿وَاللَّهُ يَعْلَمُ مَا فِي السَّمَاوَاتِ وَمَا فِي الْأَرْضِ﴾

يعني اللي يعلم كل شيء في الكون كله
مش هيعلم اللي في قلبك؟

المشكلة مش في كلمة “آمنا”.

المشكلة إن الإنسان أحيانًا
يظن إنه ممكن يخدع الله بكلامه!
علشان كده الآية بعدها قالت:

﴿يَمُنُّونَ عَلَيْكَ أَنْ أَسْلَمُوا
قُلْ لَا تَمُنُّوا عَلَيَّ إِسْلَامَكُمْ
بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ﴾

يعني الإسلام مش معروف بتقدمه لربنا.
ده نعمة ربنا أعطاها لك.
الإيمان بإللي استقر في قلبك, مش كلمة بتقولها وخلاص
أنت إللي محتاج للإيمان, مش ربنا إللي محتاجه

الإنسان لما يفهم ده يتواضع.
وكل ما يعمل طاعة يحمد ربنا إنه وفّقه لها.
ويفهم كويس إن هو إللي محتاج للطاعة دي علشان يقرب لله
أما الله سبحانه, فهو غني عن العالمين

– اللهم طهر قلوبنا