كلام ستات وشوية تكات

كتبت / عزه السيد

كلام جميل اسمعيه واعملى بيه

عاوزة مطبخك يبقى أسطورة؟
خدي مني شوية أسرار مجرّبة من قلب البيوت المصرية

البيض المشروخ

لو عايزة تسلقيه من غير ما ينزل منه حاجة… حطيه في مصفاة فوق حلة نصها ميّه، غطيه وسيبيه 10 دقايق على البخار. هيطلع زي الفل

ريحة المحشي

قبل ما تقفلي على الحلة حطي معلقة قشطة وسيبيه 5 دقايق بس… الريحة هتفحفح وتوصل لآخر الشارع والجيران هيتلموا.

لون الطبيخ الأحمر

سر الصلصة الحلوة: حمّري البصلة كويس، وضيفي معلقة بابريكا… هتاخدي لون أحمر جميل حتى لو الطماطم فاتحة.

تسوية اللحمة بسرعة

جربي ترمي كذا نواة بلح في الشوربة… هتلاقي اللحمة استوت أسرع من العادي

المخبوزات الطرية

مع الخميرة حطي معلقة صغيرة بيكنج بودر + معلقة كبيرة خل… محسن طبيعي يخلي العجين هش وطرى

الرز المفلفل

شوّحيه في معلقتين زيت + معلقة سمنة أو زبدة، وبعدين نزلّي المية والملح… ولما يتشرب وطّي عليه. هتلاقيه مفلفل وبيلمع

المخلل المقرمش

في لتر ميّه التخليل حطي: ٣ معالق ملح + معلقة سكر + معلقة خل + نص معلقة ملح ليمون… كده المخلل هيبقى مقرمش ومش هيعمل ريم

التوابل من غير رطوبة

حطي معلقة ملح كبيرة في كل برطمان (فلفل – كمون – أي توابل)… الرطوبة مش هتقرب منها.

بديل كريمة الطبخ

كوب لبن + معلقة صغيرة دقيق + معلقة صغيرة زبدة أو قشطة… قلبيهم واستخدميهم في الشوربات والوايت صوص.

مايونيز بيتي صحي

كوب لبن + 2 جبنة مثلثات + رشة ملح + معلقة خل + معلقة سكر… اضربيهم في الخلاط وضيفي الزيت تدريجي. هيبقى أحلى مايونيز من غير بيض

كاتشب سريع ورخيص

كرملي معلقة سكر، ضيفي عليها كوب ميّه مذوّب فيه معلقة صلصة + معلقة صغيرة نشا + ربع معلقة توم بودر + نص معلقة ملح… سيبيه يغلي، هيبقى عندك كاتشب بيتي زي الجاهز.