كلام ستات وشوية تكات

كتبت / عزه السيد

كلام جميل اسمعيه واعملى بيه

 بديل البيض للبانيه: 

اخلطي معلقتين ماء بصل مع فلفل أسود وملح ومعلقتين دقيق، غلفي بيهم البانيه ثم بقسماط، هيطلع مقرمش وطعمه حلو جدًا.

 عند تقوير الباذنجان،:

حطي التقوير فورًا في طبق فيه ماء وملح علشان ما يغمقش. وبعد ما تخلصي صفيه واعمليه مسلوق أو مقلي أو بابا غنوج وطعمه هيطلع تحفة.

 تقوير الكوسة متترميش:

تقدري تعملي بيه عجة، أو تزوديه على شوربة العدس، أو تحطيه مع رز المحشي ويتسوي معاه وطعمه بيبقى جميل جدًا.

 أي تسبيكة طماطم :

ضيفي لها ربع معلقة سكر، بتوازن الطعم وتقلل الحموضة وكمان بتساعد اللحمة تستوي أسرع.

 لو بتسلقـي الليمون للمخلل،:

ماء السلق كنز: احتفظي بيه في زجاجة واستخدميه مع صابون المواعين للتلميع، أو لرش الرخامة وتعقيمها، أو مع خلطة تنظيف البوتاجاز والسيراميك أو حتى في ماء المسح.

 لنجاح الكيكة والمعجنات:

اعصري نصف ليمونة على العجينة أو أضيفي معلقة خل… طراوة ملحوظة ومحسن طبيعي ممتاز.

 الفاصوليا أو اللوبيا الناشفة:

لو اتنقعت ليلة كاملة قبل الطبخ، هتستوي أسرع ومش هتاخد وقت.

 بديل سريع للكريمة: 

معلقتين زبدة + لبن كامل الدسم واشتغلي بيهم عادي.

 لتخزين الجزر: 

قشريه واغسليه وقطعيه حسب الاستخدام؛ للشوربة قطع كبيرة، ولللحمة المفرومة ابشريه، ومع البسلة قطعيه مكعبات صغيرة. وعند الاستخدام دخليه على الأكلة

 كوب واحد من ماء سلق المكرونة:

على صلصة الطماطم هيخلي القوام متماسك وطعمه أغنى بسبب النشا الطبيعي.