كلام ستات وشوية تكات

كتبت / عزه السيد

 

كلام ستات وشوية تكات هتوفّر عليكي تعب وفلوس وتخلي أكلِك دايمًا مظبوط

ركّزي معايا واحدة واحدة

 

1️⃣ الفينو لما يفضل

أوعي تسيبيه برّه

لفّيه كويس وشيلِيه في الفريزر

وقت ما تحتاجيه:

طلّعيه  حطيه في صينية  رشي عليه شوية مية بالبخاخ

ودخّليه الفرن

هيرجع طازة كأنه لسه طالع من الفرن

 

2️⃣ العيش البلدي

علشان يقعد مدة أطول وما يعفنش

سيبيه يهوي نص ساعة على الترابيزة

وتحتيه ورق أو قماشة

لما ينشف سنة بسيطة

غلّفيه في أكياس

وشيليه في التلاجة

هيقعد معاك مدة طويلة من غير ما يبوظ

 

3️⃣ هريسة الشطة زي الجاهزة بالظبط

اسلقي الفلفل الأحمر على بخار مية

واضربيه في الكبة

ضيفي:

شوية زيت

شوية خل

معلقة سكر صغيرة

⚠️ قبل ما تقطعي الفلفل

ادهني إيدك بشوية زيت

علشان متتحرقش

ولو نسيتي:

افركي إيدك بليمة

وبعدين صابون

 

4️⃣ كفتة الرز متفكش منك

ضيفي عليها شوية شعرية

تمسك الكفتة

وتدي طعم أحلى كمان

 

5️⃣ طاجن البامية باللحمة

بعد ما يخلص

هاتى:

فصين توم

قرن فلفل

شوية كزبرة ناشفة

وحمّريهم في حتة لية خروف

أو معلقتين سمنة بلدي

وطشي الطاجن

ورشي على الوش كزبرة خضرا

هتاكلي وتدعيلـي

 

6️⃣ السبانخ متسودش منك

وتفضل لونها أخضر وجميل

اسلقيها في مصفاة على البخار

وسيبيها تتصفّى

ضيفيها على التسبيكة

غلوتين بس

واطفي

وطشيها بتوم + كزبرة + قرن فلفل

تحفة

 

7️⃣ العسل الأسود كنز

خلي عندك برطمان دايمًا

ضيفي عليه ليمون

وخدي معلقة كل يوم على الريق

ينفع لـ:

الهالات

الكحة

الأنيميا

نضارة البشرة

نشاط وحيوية

مع الاستمرار

 

8️⃣ اللبان الدكر… حكاية تانية

هاتيه من العطار بـ 10 جنيه

أول ما تصحي

خدي فص على الريق

وشوفي ريحة بقك

يعالج:

التهابات المعدة

الانتفاخات

يفتح النفس على الأكل

خدي فص:

وسط اليوم

قبل النوم

والفرق هيبان لوحده