كلام ستات وشوية تكات

كتبت / عزه السيد

كلام جميل ونصايح مجرّبة وتظبيط مطبخ على أصوله
يلا نبدأ
الملوخية خفيفة زيادة؟
لو الشوربة زادت وطلعت خفيفة
حطي الملوخية في مصفى ضيّقة
هينزل جزء من الشوربة
رجّعي الملوخية اللي في المصفى على باقي الحلة
أو زوّدي شوية ملوخية ناشفة
والأهم دايمًا  الشوربة تتحط بالتدريج
الكيك وشّه اتحرق؟
ولا يهمك
رشي عليه سكر بودرة
ودخّليه الفرن تحت الشواية 5 دقايق
ودوقي أحلى طعم
السمك المقرمش الصح
وانتي بتقلي
ضيفي شوية نشا + بيكينج بودر على الدقيق
والقرمشة هتتكلم لوحدها
ريحة الأكل في المطبخ؟
هاتي كوباية مية
وحطيها في إناء على النار
ضيفي شوية فانيليا
وسيبيها تغلي
وشمّي أحلى ريحة في مطبخك
تحفظي الليمون للموسم كله؟
حطيه في كيس
ودخّليه الفريزر
وعند الاستخدام
طلّعيه وحطيه تحت الميه على طول
هيرجع كأنه طازة
الخيار يقعد أطول في التلاجة
لفّيه في ورق
وبعدين في كيس بلاستيك محكم
ويعيش معاكي مدة حلوة
تنضيف مبشرة الجبن والمصفاة السلك
استخدمي فرشة أسنان
هتنضف أدق حتة
رخامة المطبخ اصفرّت؟
ادعكيها بـ عصير ليمون + ملح
واغسليها
وترجع بيضا زي الأول
بقع القهوة العنيدة
تتشال بإضافة
شوية نشادر مع مية الغسيل
وبعدين شطف وتجفيف كويس
تنضيف إناء الخلاط في ثانية
حطي شوية مية
نقطة صابون أطباق
وشغّلي الخلاط
وشوفي النتيجة بنفسك
لمعة سيراميك المطبخ
في مية فاترة
ضيفي شوية خل أبيض
قطرات ليمون
شوية كحول نقي
ويمسح بيه
لمعة تحفة.