نصائح لست البيت للتوفير في الميزانية
كتبت / عزه السيد
نصائح هامه لست البيت
أفكار بسيطة بس هتوفر معاكِ وقت وفلوس ومجهود
البصل:
جيبي نص كيلو بصل، قشريه وافرميه في الكبة أو بالمبشرة.
قسّميه في أكياس وافرديهم كويس وحطيهم الفريزر.
وأول ما تطبخي… كسري قطعة وخلاص!
هتوفر معاكي وقت ودموع
الثوم:
ربع كيلو ثوم… قشريه واحتفظي بيه في برطمان في التلاجة.
آخر 5 دقايق من الطبخ هاتي فص واحد بس واهرسيه،
هيرجعلك طعم كأنك حطيتي رأس ثوم كاملة!
الكفتة الاقتصادية:
على أي كمية لحمة ضيفي رغيف عيش مبلول ومتصفي + بصلة مبشورة + معلقة دقيق وتوابل.
شكليها ورصيها في صينية ودخليها الفرن…
هتزود الكمية للنص ومحدش هياخد باله
بديل الطماطم المكلفة:
ربع كيلو طماطم + معلقة صغيرة بابريكا في الخلاط.
استخدميها في الطبيخ كأنك استخدمتي كيلو كامل
البرجر:
على ربع كيلو لحمة ضيفي نص كباية بقسماط ناعم + توابل + بصلة.
شكلي كور وافرديها واقليها في شوية زيت…
هتكفي عيلة كاملة من غير ما تحسي
البشاميل الاقتصادي:
٤ معالق دقيق + معلقتين سمنة + معلقتين زيت
نص كوب لبن + نص كوب شوربة
ملح وفلفل…
تحفة ومفيش فرق عن الكامل لبن
بديل الكريمة اللباني:
كوب لبن + معلقة دقيق + معلقة قشطة + معلقة زبدة.
على البارد قلّبيهم وبعدين على النار…
هتاخدي أحلى قوام بالكريمة وبأقل تكلفة
الرز البايت:
اجمعيه في علبة بالفريزر.
لما تحبيه سخن، حطيه في مصفى فوق بخار ميه…
هيطلع كأنه لسه طالع من الحلة حالًا
المكرونة البايتة:
حطيها في صينية ورشي جبنة وفلفل وزيتون ودخليها الفرن…
من جمالها هيتخانقوا عليها
الشوربة الزيادة:
حطيها في أكياس في الفريزر.
هتنفعك في المحشي والملوخية وأي طبيخ…
أحلى من المرقة الجاهزة.
