بُص يا حبيبي… الله سبحانه لما خلقنا،
ما خلقناش علشان نموت ونختفي،
الله خلقنا علشان نعيش للأبد.
وخلق لنا مكانين نعيش فيهم للخلود:
جنة فيها نعيم أبدي لا ينتهي،
ونار فيها عذاب أليم.
وأدّانا حرية الاختيار.
اللي يختار الجنة… يدخلها ويعيش فيها للأبد.
واللي يختار النار… يدخلها ويعيش فيها للأبد.
والاختيار ده ربنا جعله في صورة اختبار بسيط اسمه:
الحياة الدنيا.
فترة قصيرة جدًا نعيش فيها، ونختار بإرادتنا.
وبعد ما فترة الاختبار تخلص…
كل واحد يروح المكان اللي اختاره بنفسه.
– هو في حد هيختار النار؟
– مش بلسانه… لكن بأفعاله.
ربنا سبحانه لأنه رحيم، خلّى الاختبار سهل وبسيط:
تعبده وتطيعه، وما تشركش به شيئا.
كل شيء حلال… غير شوية حاجات حرام تبعد عنهم.
يوم طويل تعمل فيه اللي تحبه، وتصلي بس دقائق كل يوم.
سنة كاملة 12 شهر، تصوم منهم شهر واحد.
ولو معاك فلوس كتير، تطلع جزء بسيط للفقراء.
وعمر كامل، تحج فيه مرة واحدة لو قدرت.
وتكون إنسان كويس مع الناس،
ما تؤذيش حد، ولا تتكبر على حد.
لو عملت كده… إنت اخترت الجنة، وهتدخلها بإذن الله.
لكن مع إن الاختبار بسيط،
في ناس بترفض طاعة الله، وبترفض أوامره،
وبكده… هي اللي اختارت النار بإرادتها.
– طيب والموت؟
– الموت عامل زي النوم… بس نوم طويل شوية.
وبعده كلنا هنصحى، لحياة أبدية مفيهاش موت تاني.
وكل واحد يروح المكان اللي اختاره في الدنيا.
علشان كده… طول ما إنت عايش وفيك نفس،
قول لنفسك: أنا عايز الجنة.
وخلي الجنة اختيارك، بإنك تطيع الله،
وتبعد عن معصيته،
ودائما ادعى “اللهم أحسن خاتمتنا”
وثق تماما إن إللي بيحاول, ربنا مش بيسيبه
ولو عملت كدة, هتصحى يوم القيامة, وتدخل الجنة بإذن الله
وتعيش بعدها للأبد… في نعيم لا ينتهي بإذن الله.
