كتبت / عزه السيد
علمني أبى
ليه بندخل النار مع إن إبليس هو اللى بيخلينا نعمل الغلط؟
– طيب وإحنا البشر ذنبنا إيه ندخل النار،
مع إن إبليس هو اللي بيخلّينا نعمل الغلط؟
– ممم… سؤالك فيه غلطة كبيرة.
– إيه هي؟
– الغلطة إن إبليس مش بيخلّينا نعمل الغلط.
– إزاي؟
زمان جدًا،
لما إبليس عصى أمر الله واستكبر وبقى من الكافرين،
قال إنه هيحاول يغوي البشر ويوقعهم في الكفر.
لكن بعد كده قال جملة مهمّة جدًا.
– قال إيه؟
قال:
﴿إِلَّا عِبَادَكَ مِنْهُمُ الْمُخْلَصِينَ﴾
يعني إبليس نفسه كان عارف ومتأكد
إن الإنسان اللي بيعبد الله بصدق، ويتمسك بوحي الله،
ويمشي على هدي الأنبياء…عمره ما يقدر عليه.
علشان كده ربنا سبحانه قال:
﴿إِنَّ كَيْدَ الشَّيْطَانِ كَانَ ضَعِيفًا﴾
إبليس ضعيف.
أقصى حاجة يقدر يعملها إنه:
يوسوس، يهمس، يزوّق الغلط، ويجمّل المعصية.
لكن في الآخر… القرار قرارك إنت.
إنت اللي تختار:
تؤمن ولا تكفر، تطيع الله ولا تعصيه.
ويوم القيامة،
لما الكفار يعرفوا إنهم خلاص من أهل النار ومفيش رجعة،
هيحاولوا يرموا اللوم على إبليس،
ويقولوا: يا رب إحنا مالناش ذنب.
وساعتها… هييجي إبليس نفسه،
ذليل ومقيّد،
وقبل ما يدخل النار
هيقول لهم الحقيقة اللي كانوا بيهربوا منها:
﴿وَقَالَ الشَّيْطَانُ لَمَّا قُضِيَ الْأَمْرُ
إِنَّ اللَّهَ وَعَدَكُمْ وَعْدَ الْحَقِّ
وَوَعَدتُّكُمْ فَأَخْلَفْتُكُمْ
وَمَا كَانَ لِيَ عَلَيْكُم مِّن سُلْطَانٍ
إِلَّا أَن دَعَوْتُكُمْ فَاسْتَجَبْتُمْ لِي
فَلَا تَلُومُونِي وَلُومُوا أَنفُسَكُم﴾
يعني:
الله دلّكم على طريق الحق… وإنتوا رفضتوه.
وأنا همست لكم بالباطل… وإنتوا سمعتم كلامي.
الذنب مش ذنبي،
إنتوا اللي اخترتوا طريق الكفر والمعصية بنفسكم.
وساعتها، هيبكوا ويصرخوا،
لأنهم عارفين كويس إن إبليس ما أجبرهمش على حاجة…
هم اللي اختاروا بنفسهم.
وخليك دايما فاكر قول الله عز وجل لإبليس
“إِنَّ عِبَادِي لَيْسَ لَكَ عَلَيْهِمْ سُلْطَانٌ
إِلَّا مَنِ اتَّبَعَكَ مِنَ الْغَاوِينَ”
بإيدك تختار تكون من عباد الله, وتدخل الجنة
ولا تكون من الغاوين, وتطيع إبليس فتدخل النار.
تم نسخ الرابط
