كتبت / عزه السيد
علمني أبى
– هو إيه الفرق بين الجن والشياطين؟
– ربنا سبحانه بعد ما خلق الملائكة من نور
خلق مخلوقات تانية اسمها الجن
مخلوقات خلقها الله من النار.
والجن زي البشر بالضبط فيهم أنواع مختلفة.
فيهم المؤمن وفيهم الكافر.
فيهم الصالح وفيهم الفاسد.
والجن نفسهم قالوا ده في القرآن:
﴿وَأَنَّا مِنَّا الصَّالِحُونَ وَمِنَّا دُونَ ذَلِكَ﴾
– طيب الشياطين بقى؟
الشياطين مش نوع مختلف من الخلق.
الشياطين هم نفسهم من الجن
لكن الجن اللي اختاروا الكفر والإفساد.
زي ما عندنا في البشر مؤمنين وكفار
فكل شيطان هو من جنس الجن،
لكن مش كل الجن شياطين.
إبليس نفسه كان من الجن.
ربنا قال:
﴿إِلَّا إِبْلِيسَ كَانَ مِنَ الْجِنِّ فَفَسَقَ عَنْ أَمْرِ رَبِّهِ﴾
ولما كفر بقى رأس الشياطين.
والشياطين علشان كفار فبيوسوسوا للإنسان
ويحاولوا يبعدوه عن ربنا, علشان يكفر زيهم
لكن ربنا قال حاجة مهمة جدًا:
﴿إِنَّ كَيْدَ الشَّيْطَانِ كَانَ ضَعِيفًا﴾
يعني الشيطان ما يقدرش يجبرك على حاجة.
أقصى حاجة يعملها إنه يوسوس.
لكن القرار في الآخر… قرارك.
تطيع ربنا وتدخل الجنة
أو تسمع كلام الشيطان وتكفر, فتدخل النار
– اللهم ثبّت قلوبنا على طاعتك.
تم نسخ الرابط
