كلام ستات وشوية تكات

كتبت / عزه السيد

تعالي أقولك كلام مفيد وشوية تكات فى الطبخ مفيدة جدا

— حضرى خلطة تحمير الفراخ عباره عن (دقيق – نشا – بقسماط – ملح- فلفل- توابل ) فى برطمان كبير وضعى به معيار يسهل الاخذ منه عند كل تحمير

— حطى شويه بيكينج بودر ومعلقه نشا مع البقسماط وانتى بتحضري البانيه او الفراخ الكنتاكى بتبقى مقرمشه وطعمها حلو

— حطى شويه عسل ابيض مع تتبيله البانيه

— حطى شويه لبن على خلطة البانيه او زبادى بيبقى خطير

— حطى علي الكفته نصف معلقة بيكينج بودر علشان تنفش واطفى الفحم قبل ما تصبعى وياريت لو تتعمل من بليل وكمان الحواوشى اعمليه بنفس طريقة الكفتة

— الزبادى في عجينة البيتزا بيفرق كتير وعلشان تشد زى بره بنحط البيتزا عشر دقايق ونخرجها ونوزع الموتزاريلا علي الوش وندخلها تاني الفرن يدوب تسيح ونطلعها بتبقى بتشد زى بره وحطى كميه كويسه من الجبنه هتبقي زي بتاعة المطاعم

— لما تيجى تسخنى البيتزا فى الفرن لو بايته حطى معاها فنجان او طبق فيه ميه هتخليها طازة وتحفه

— البيتزا لما تيجى تبططيها خليها علي دقيق السميد ( سمولينا ) هتبقى زى بتاعت المحلات

— البشاميل بعد ما تطفي عليه وهو سخن حطي جبنة موتزاريلا كتير هتسيح جواه وبعدين حطيه علي المكرونة بيخليها بتمط وتحفة

— بدل ماتحطي بيض على وش صنيه المكرونه حطي قشطه هتلاقي لون وطعم تحفه

— صلصه الفته حطي فيها بشره صغيره جوزه الطيب

— حطي نصف ملعقه سكر مع اي طماطم اوصلصه في اي اكله وبردو مع تتبيلة الفراخ

— وانتي بتحمري البصله لاي خضار حطي عليها فلفل اسود وشمي احلي ريحة صلصه

-التكة الاساسيه السكر مع اللحمه مع الطماطم مع الملوخيه.

— الملوخية الخضرا بعد ما تحطيها في الشوربة حطي نصف معلقة سكر صغيره او اقل شويه بيخليها حلوة اوي.

و وانتي بتخرطيها خرطي معاها قرن فلفل بيديها طعم جنان وطبعا نصف معلقه سكر صغيره وقت السوا وفي الطشه بعد ما احمر التومه والكزبره ببشر طمطمايه صغيره واسيبها تتسبك مع الطشه واحطها على الملوخيه طعمها بيبقى جميل

— انقعى الفراخ فى ميه وخل قبل ماتسلقيهم بساعة عشان يستوا بسرعة

— نصف ملعقة سكر مع كباب الحله علشان اللحمه متسودش

— علشان اى لحوم تستوى بسرعه تحطى نص معلقه سكر وتهدى النار عليها

— تسويه الاكل على نار هاديه اطعم بكتير

— لما تيجى تقلى السمك لو حجمه كبير افتحيه بالسكينه فتحتين علشان ميبقاش نى من جوه

وتبليه بملح وكمون وفلفل اسود وكزبره ناشفه وثوم بودر ولمون كتير

وقلبيه فى دقيق مع نشا واقلية مع زيت غزير

وكلى احلى سمك دهبي ومقرمش والزيت زي الفل على عكس التوم الصحيح والفلفل بينزل فى الزيت ويتحرق وبيخلى السمك تقيل.

— بلاش تستعملي توابل كتير فى الاكل كتر التوابل بتضيع طعم الاكل

وكتير جدا مش بستعمل غير الملح والفلفل الاسود فى معظم الأكلات

— وانتي بتسقي المحشي حطي مع الشوربه اللي هتسقي بيها شويه زيت ذره وفلفل اسمر وشطه ومعلقتين صلصه هتخلي طعم المحشي جميل وبيلمع.