كلام ستات وشوية تكات

كتبت / عزه السيد

كلام ستات وشوية معلومات سريعه لكل ست شاطره بتحب بيتها هتساعدك في شغل المطبخ وتوفر وقتك ومجهودك

— وانتي بتعملي الاكل لو مثلا بتعملي خلطة محشي او تسبيكة مكرونة أو بتعصجي لحمه مفرومه اعملي زياده شويه وشيلي في الفريزر اي اكله ينفع تزودي وتشيلي منها جاهزه هينفعوكي جدا وقت زنقه

— لو هتتطبخي خضار مجمد طلعيه من الفريزر وتحطيه في الحلة على النار على طول والصلصه بتغلي ماعدا الملوخيه

— لما تسلقى فراخ او اى طيور نشيلها من الشوربه بعد سلقها اما بالنسبه للحمه يفضل ان احنا منخرجهاش من الشوربه الا عند الاستخدام عشان متنشفش

— لما تعصجي اللحمه المفرومه بيكون مقدار البصل نفس مقدار اللحمه المفرومه

— لما تعملى اللحمه المفرومه كفته كيلو اللحمه المفرومه الصافي عليه ربع كيلو دهون

— وانتي بتقلي السمك حطي قشر الليمون في الزيت مش هيخلي ريحه زفاره ولا دخان

— وانتي بتحمري البفتيك حطي معلقه زبده مع الزيت هيبقي زي بتاع المطاعم

— قبل ما تسوي اي حاجه في الفرن سخنيه الأول جيدا عشان الاكل مينشفش

— ضيفي على الرز دايما مياه مغليه مش بارده علشان ميعجنش

— وانتي بتقوري البتنجان ادعكي ايديكي بالليمون عشان متسودش وقبل ماتقشري الكوسه ادهني ايديكي زيت عشان الصمغ هيبهدل ايديكي .