كلام ستات وشوية تكات
كتبت عزه السيد
كلام ستات مهم جداً اسمعيه هيفيدك جدا جدا
— لو عايزة المرايات تبرق من غير أي علامات
امسحيها بسلكة مواعين ناشفة وهتتفاجئي بالنتيجة
— غلاية الشاي الكهربا متتسابش من غير تنظيف لفترة طويلة نضفيها مرة كل أسبوع لو استانلس اغلي فيها كركديه هترجع تلمع ولو زجاج استخدمي مية مع خل ورشة ملح وهتشوفي الفرق بنفسك
— حطي شوية خل في زجاجة سائل المواعين
ده بيساعد في قتل البكتيريا ويدي لمعة حلوة للحلل
وكمان يقلل من تأثير المنظفات
— في صابونه مخصصة للبقع بتعمل شغل ممتاز بترجع الألومنيوم جديد والاستانلس يلمع وحوض المطبخ هيبرق ولو مش متاح يبقي صابون الغسيل البلدي
— أي أكلة تعمليها شيلي منها جزء صغير في الفريزر،في علبه محكمه الغلق وفي نهاية الأسبوع هتلاقي عندك وجبات جاهزة ليوم راحة من المطبخ
— سر المطبخ النضيف على طول اعملي بس ربع ساعة يوميًا تعملي حاجة بسيطة:
يوم ضلفة، يوم تلاجة، يوم توابل، يوم رف…
وهتلاقي مطبخك دايمًا متظبط من غير تعب كبير
— اعملي حصالة صغيرة للمطبخ أي فكة حطيها فيها، وآخر الشهر هاتي بيها حاجة بسيطة تفرحك وتجمّل مطبخك وجربي كمان تطلعي منها صدقة، هتحسي ببركة كبيرة في بيتك .
