كلام ستات وشوية تكات

كتبت عزه السيد

 

تعالي أقولك شويه تكات في الطبخ هتفرق معاكي جدا جربيها هتعجبك وهتلاحظي بفرق

— ضيفي ملعقتين لبن مثلج مع البيض وأنتى بتعملى الفراخ البانيه عشان الزيت مايتحرقش.

— وانتي بتعملي صلصة اي طبيخ بعد ماتشوحي البصل ويصفر ضيفي معلقة ثوم مفروم صغيره تقليبتين وانزلي بعصير الطماطم ومعلقة سكر صغيره ودوقي احلي خضار

— دايما أفرمى كميه ثوم وحطيها فى كيس وحدديه مربعات على اد الطبخه فى الفريزر تستخدميها .

— عصير الجوافه أو الموز ضيفي عليه نقطتين ليمون ميخلهوش يسود.

— ضيفي شوية خل فى مياه غسيل المواعين بتمنع التصاق الصابون وبتنضف وتطهر وتلمع المواعين.

— لحفظ الليمون سليم بدون عصر نلف كل ليمونه فى ورق جرايد ونحطهم فى علبه كده بيعيش مده اطول

— بعد ما نتبل البانيه نحطه فى البقسماط وعلى الفريزر ربع ساعه هيتماسك معانا ومش هيفك ابدا واحنا بنحمره

— اللحمه مش بيتحطلها ملح الا ف آخر نص ساعه وشوية سكر صغيرين لو اللحمه كبيرة بتساعدعلى التسويه بسرعه

— مانحطش زيت في مية سلق المكرونة عشان الصوص يمسك فيها ومتبقاش كأنها مسلوقة

— شوحي الفراخ بملح وفلفل قبل ما نضيف مياه الشوربه السخنه بتفرق جدا فى الطعم

— ضيفي على عصير الليمون ربع كوبايه لبن بيبقي تحفه

— الطماطم بعد ما تتعمل بالخلاط بتتصفي من القشر والتفل عشان مش كويس خاصة للناس اللي معدتها تعبانه وبيعمل مراره

— للتخلص من اي دهون على البوتجاز كربانوتو وملح ليمون وخل بتشيل اي دهووون

— لو مش عاوزين الكفته تكش منك ضيفي معلقه بقسماط ونص معلقه بيكنج بودر عليها

— وأنتى بتقلى السمك حطى معلقة نشا مع الدقيق وبعدين حطيه فى ماء مثلج بسرعة وحطيه فى خليط الدقيق والنشا تانى هيطلع مقرمش زي بتاع المطاعم بالظبط .