كلام ستات وشوية تكات

كتبت / عزه السيد

كلام ستات مهم جدا اسمعيه

السمك المقلى بيشرب زيت:

حطى ربع كوب نشا مع كوب دقيق وغلفى السمك وأقليه فى زيت ساخن وطلعيه على مصفى علشان يفضل مقرمش.

شربات الحلويات لو بيسكر منك، استخدمي بدل الليمون ملح الليمون

ربع معلقة صغيرة على كوبيتين سكر + كوبيتين مية، ومش هيسكر أبداً.

لو الرز بيلزق في الحلة

حطي معلقتين مية بعد ما تطفي النار وغطّي الحلة، البخار هيفصل الرز بسهولة.

المكرونة بالبشاميل أو الصلصة بتعجن؟

اسلقيها ¾ سوا بس.

البشاميل فيه تكتلات؟

سيبيه يبرد واضربيه في الخلاط يرجع ناعم.

الليمون بيبوظ بسرعة؟

خزّنيه في الفريزر زي ما هو واستخدميه وقت الحاجة.

الفراخ فيها زفارة؟

انقعيها في مية + ليمون + دقيق + ملح + سكر (أفضل من الخل).

الكبدة المجمدة

بلاش تغسليها، حطيها في مصفاة مع ربع كوباية لبن تمنع الزفارة.

اللحمة بتشد بعد السوا؟

حطي معلقة سكر في الشوربة أثناء السلق هتطلع طرية جدًا.

 معلومات سريعة ومفيدة

سلق اللحمة على نار عالية أول 10 دقايق يقفل المسام ويحافظ على طراوتها، وبعدها نوطي النار.

فوطة قطن تحت لوح التقطيع تمنع الانزلاق وتحمي إيدك.

نقطة فانيليا في مية المسح تخلي ريحة البيت جميلة وثابتة.

تخزين البهارات في برطمانات زجاج يحافظ على نكهتها أكتر.

معلقة سكر مع صلصة الطماطم بتوازن الحموضة.

دهن الصينية زبدة أو زيت + دقيق يمنع التصاق الكيك.

عصر ليمونة على الفراخ قبل التتبيل يساعدها تشرب التتبيلة أسرع.

معلقة سمنة على الرز بعد ما يتشرب تخليه مفلفل وأبيض.

تنظيف الحنفية بمعجون الأسنان يديها لمعة جميلة.

مسح البوتاجاز وهو دافئ (مش سخن جدًا) بيسهل إزالة الدهون.