كلام ستات وشوية تكات

كتبت عزه السيد

تعالي أقولك كلام مهم وشويه حاجات اعمليها وانتي بتطبخي هتنفعك وحاجات تانيه اوعي تعمليها

— وانتي بتعملي الكيكة بلاش تستعجلي عليها في فتح الفرن قبل ما يمر عليها ٢٠ دقيقه

— بلاش تغسلي الخضرة بعد ماتقطعيها لانها هتفقد نص الفيتامينات اللي جواها اغسليها الأول وبعدين قطعيها

— بلاش تطبخي الخضار في شوربة أو ماية كتير خلي الكمية مناسبة لكمية الخضار عشان تحتفظي بفوائدها

— بلاش تغطي الحلة كلها وانتي بتطبخي لأن الخضار هيتاكسد ويغمق لونة

— بلاش تطبخي الخضار مع اللحمة عشان مستعجلة اسلقي اللحمة الأول وبعدين حطي الخضار عشان سوي اللحمة بيكون وقته اطول

او شوحي اللحمه الاول لحد ما تستوي وبعدين حطي الخضار

— بلاش تحطي الملح وانتي بتسلقي اللحمه في الأول حطيه لما تقرب تستوي عشان تستوي اسرع

— بلاش تطبخي الخضار مده كبيرة عالنار خلي تسويته مظبوطه عشان تحتفظي بفوائده

— بلاش تقطعي الفواكه أو الخضار قطع صغيرة لأن الفوائد بتاعتها هتقل قطعيها بحجم كبير هتبقى مفيدة للصحة و الاسنان

— بلاش تحطي ملح علي السلطة قبل الأكل بفترة كبيرة لأنه هيخلي الخضار يذبل وينزل مايتة حطية قبل الأكل علطول

— وانتي بتطبخي البامية أو الفاصوليا الخضراء بلاش توطي النار خليها علي نار عاليه في الأول تغلي غلوتين وبعدين وطي النار عشان متسودش.