علمني أبى..قَدْ يَعْلَمُ اللَّهُ الَّذِينَ يَتَسَلَّلُونَ مِنكُمْ لِوَاذًا﴾

كتبت / عزه السيد

علمني أبى

– ربنا قال في سورة النور:

﴿لَّا تَجْعَلُوا دُعَاءَ الرَّسُولِ بَيْنَكُمْ

كَدُعَاءِ بَعْضِكُم بَعْضًا

قَدْ يَعْلَمُ اللَّهُ الَّذِينَ يَتَسَلَّلُونَ مِنكُمْ لِوَاذًا

فَلْيَحْذَرِ الَّذِينَ يُخَالِفُونَ عَنْ أَمْرِهِ

أَن تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ﴾

– يعني إيه لِوَاذًا؟

– كلمة لِوَاذًا

يعني: يتخفّوا ويهربوا بهدوء من غير ما حد ياخد باله.

زي واحد ينسحب من مكان بالتدريج

علشان محدش يشوفه.

– طيب الآية بتتكلم عن إيه؟

الآية بتتكلم عن التعامل مع النبي ﷺ.

ربنا بيقول للمؤمنين:

﴿لَّا تَجْعَلُوا دُعَاءَ الرَّسُولِ بَيْنَكُمْ كَدُعَاءِ بَعْضِكُم بَعْضًا﴾

يعني:

لا تتعامل مع النبي ﷺ كأنه شخص عادي.

لما تتكلم مع النبي ﷺ لازم يكون في احترام

ولما يناديك… أو يأمرك بحاجة…

لازم يكون في وطاعة.

فطاعة النبي ﷺ هي طاعة لله.

لأن النبي ﷺ يحكم بما أمر الله به

– وبعدين ربنا كشف سلوك خطير وقع فيه بعضهم

﴿قَدْ يَعْلَمُ اللَّهُ الَّذِينَ يَتَسَلَّلُونَ مِنكُمْ لِوَاذًا﴾

يعني:

في ناس كانت تحضر مع النبي ﷺ،

لكن لما يطلب منهم حاجة أو يكون في أمر مهم…

يبدأوا ينسحبوا بهدوء ويهربوا من غير ما يلتزموا.

فربنا بيقول: أنه يعلمهم ويعلم أفعالهم.

فلا تحسبوا أن تسللكم يخفى عليه سبحانه

وبعدين التحذير القوي:

﴿فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ

أَوْ يُصِيبَهُمْ عَذَابٌ أَلِيمٌ

احذروا إنه بسبب الفعل ده ممكن يقل إيمانكم وتقعوا في الكفر

أو يصيبكم الله بعقاب شديد بسبب الأفعال دي

– اللهم ارزقنا حب نبيك ﷺ وطاعته.