كلام ستات وشوية تكات
كتبت / عزه السيد
كلام مهم جدا اسمعيه هيفيدك جدا
كل ست بيت مع الوقت بيبقى عندها شوية أفكار صغيرة بتوفر عليها وقت ومجهود، وبتخلي الطبخ أسهل بكتير خصوصًا في الأيام الزحمة. حبيت أشارككم شويه نصايح بعملها في بيتي ويمكن تعجبكم أنتم كمان زوجة نشيطة وشطورة.
البطاطس الصغيرة
متسيبيهاش في السوق، بالعكس دي عملية جدًا. اغسليها كويس واسلقيها، وبعدها ممكن تتحمر، أو تتشوح في زبدة مع رشة روزماري، أو حتى تتهرس. طعمها جميل وسعرها غالبًا أوفر.
التوم المفروم
افرمي كمية مرة واحدة، وقسميها في أكياس أو مكعبات تلج وخزنيها في الفريزر. وقت الطبخ هتلاقيه جاهز في ثواني بدل التقشير والفرم كل يوم.
برطمان شطة مفرومة
اعمليه بالشكل اللي تحبيه، بثوم أو من غير، وخليه في الفريزر. هيكون جاهز للسمك، والمخللات، وأي أكلة محتاجة شطة، وخدي منه الكمية اللي تكفيك.
الخضرة المفرومة
الشبت والبقدونس والكزبرة لما يتغسلوا ويتصفوا كويس ويتفرموا ويتخزنوا في الفريزر، هيوفروا وقت كبير جدًا، خصوصًا في الأيام اللي بتكوني مستعجلة فيها.
لسان العصفور أو الشعرية
حمري الكمية كلها مرة واحدة وسيبيها تبرد، وبعدها خزنيها. كل مرة هتاخدي منها الكمية اللي محتاجاها بس، وممكن كمان تتحمص من غير زيت.
الكوسة اللي قربت تذبل
بدل ما تترمي، قطعيها وشوحيها مع بصلة خفيفة وخزنيها. ولما تحتاجي تعملي صينية أو صلصة هتكون جاهزة في دقائق.
اللحمة المفرومة
وأنتِ بتعملي تعصيجة، زودي الكمية شوية وخزني الباقي. هينقذك في المكرونة، أو البشاميل، أو أي أكلة سريعة.
الكفتة
شكليها كلها مرة واحدة، ورصيها في أطباق أو أكياس، وبعد ما تتجمد احفظيها. وقت الاستخدام هتطلعيها على التسوية مباشرة.
برطمانات التتبيلة الجافة
اعملي برطمان للدجاج فيه دقيق وملح وجنزبيل، وبرطمان تاني للسمك بالتوابل اللي بتحبيها. هيوفروا وقت كبير وقت القلي.
اللبن
حاولي دايمًا يكون عندك كيس احتياطي في الفريزر، لأن أكيد هيجي يوم تحتاجيه فجأة ومش هتضطري تنزلي تشتريه.
