كلام ستات وشوية تكات
كتبت / عزه السيد
كلام مهم ونصايح مفيدة لكل ست شاطره هتسهل عليكي كثير وقت ومجهود وهتحسي بالفرق لو جربتيها
— عارفه البطاطس الصغيره بتاعة الحشو هاتيها اغسليها كويس واسلقيها وممكن تحمريها في الزيت او تدحرجيها في حته زبده بلدي أو تهرسيها بيتعمل منها حجات كتيره أوي زيها زي الكبيره واحلا كمان بتبقي ارخص ويبقي توفير
— خلي عندك توم مفروم في الفريزر مش هيخليكي تكسلي تحطي توم على الاكل علشان بتضايق من تقشيره كل شويه كمان بيوفر مكان اللي تحطي فيه التوم بقشره
— خلي عندك برطمان فيه فلفل شطه حار مفروم وعليه شوية توم أو من غير توم في الفريزر بتحطي منه في حشو السمك أو بتنجان مخلل كمان وتاخدي منه علي مقدار حاجتك اسهل من إني أعمل كل شويه ممكن يطلع شويه عن اللي عايزاه أو كتير
— يكون عندك كيس صغير في الفريزر فيه شويه خضرة شبت بقدونس مفرومين لأي ظرف عايزه تعمل حاجة ومش متاح أجيب خضرة في الوقت ده
— لما تعملي لسان عصفور أو شعريه حمري الكيس كامل وخدي منه احتياجك وحطي الباقي في الفريزر لو مش حابه تحطيه في الفريزر يبقي يتحمص من غير زيت علشان ميزنخش
— عندك كوسه وقربت تبوظ قطعيها وشوحيها في بصله وعلي الفريزر ووقت الاستخدام تنزل على الصلصه علطول
— وانتي بتعصجي لحمه مفرومه زودي منها شوية وعلي الفريزر تاخدي منها على مكرونة بشاميل أو تحطيها على مكرونة عاديه ولو احتاجتي في أي وصفه معلقتين تلاته يكون عندك
— لو بتعملي كفته تصبعيها وتحطيها في اطباق فل وعلي الفريزر تنزليه يفك ودخليها فرن البوتاجاز وكده عملتي الغدا
— اعملي برطمان فيه دقيق وملح لغسل الطيور و برطمان دقيق وتوابل للسمك
— دايما خلي عندك كيس لبن في الفريزر لأي ظرف تحتاجيه.
