كلام ستات وشوية تكات

كتبت / عزه السيد

اسمعي الكلام ده مهم جدا

اكنس بيتك ورشه ماتعرف مين يخشه

هقولكم شويه #نصايح على قدي كدا نعملها كل يوم

أفتحي الشبابيك و غيري هوا البيت وده بيمنع ريحة الكمكمه في البيت

الهدوم في الاوضه هي اللى بتكركبها فا اول حاجه نعملها بنطبق الغسيل النظيف واللي مش نظيف نحطه في باسكت الغسيل وياريت تشغلي الغساله علي طول

رتبي السراير اول ما تصحي لأنها لو مش مترتبة هتحسي أن الاوضة مكركبة وغيري ملايات السرير

اكنسي سجاد الشقة كله بالمكنسة و امسحي بالشرشوبة السيراميك اللي باين ورشي معطر أو دوني أو حتي شوية ميه علي اي مسحوق علي السجاد الله علي ريحة النظافه

بفوطة امشي على كل الأسطح أزاز أو خشب و لمعيه من التراب

أكنسي البلكونات يوم أه و يوم لا ، و امسحيها مرة في الأسبوع

أهم حاجه وانتي شغاله في البيت شغلي اذاعه القران الكريم على التليفزيون او لو ف راديو يبقي حلو اوى وبركه في البيت

بالنسبه لتنظيف المطبخ المواعين أول باول ، و البوتاجاز لازم يتغسل يوميا، و كل يوم تمسكي درج أو ضلفة ترتبيها، و أرضية المطبخ تتمسح يوميا او على الاقل تتكنس المهم يبقي نضيف

لما النور بيقطع لو عندك اوضه عايزه تتنظف ننظفها على الكشاف نضيع وقت وفي نفس الوقت لما النور بيجي نحس براحه نفسيه وانجزتي حاجه عليكي

بعد ما تخلصي مواعين الغدا عطري الشقة بأي حاجة عندك معطر أو بخور أو حتي فانيليا علي قطعة فحم هتخلي ريحة الشقه تحفه

يوم من كل أسبوع تنظيف عميق نشيل السجاد و نحطه في البلكونة و نكنس الشقة و نمسح و نلمع الخشب ، و نغير الملايات واليوم دا بيبقى يوم الخميس ( ممكن تخليه على يومين ، الاربع مثلا و الخميس)عشان تستعدي ليوم الجمعه والصلاة وقرأة القران و فيه ساعة اجابه للدعاء

وأخيراً وليس اخراً حاولوا ماتبيتوش زباله في البيت وان حصل اقفلو الكيس كويس وحطوه جوه كيس كمان ورشي عليه كربوناتو عشان يزيل اي ريحه،