كلام ستات وشوية تكات

كتبت عزه السيد

كلام جميل اسمعيه هيفيدك جدا

صحيتي الصبح والدنيا مقلوبة من العيال والشقة تضرب تقلب وعايزة ترويق وتنضيف ووراكي مليون حاجة .. طبعا دي قصة حياة كل أم فينا ..

طبعا المشهد اليومي الصباحي ده كفيل انه يقفلك اليوم

لكن لو عملتي جولة هنسميها “جولة الانقاذ النفسي والمعنوي” يعني تلفي لفة سريعه في الشقة كلها تاخديها أوضة أوضة تعملي ايه بقى يا ست الكل ؟؟؟ ترويقة سريعة جدا لا تتعدي 3 دقايق لكل أوضة ..اول حاجه افتحي القران هتلاقي نفسيتك هديت .

3 دقايق ؟؟؟ انتي بتستهبلي يا ستي انتي؟؟
اصبري عليا بس

ايوة 3 دقايق تروقي السراير فيها تفتحي الشبابيك .. تدخلي الشمس .. تلمي اللعب بتاعة العيال تلمي الاوراق والمهملات في كيس في ايدك .. تلمي الهدوم اللي محتاجة تتغسل .. بس كدة من غير تنضيف ولا تلميع ولا يحزنون .

وهكذا في كل اوضة والرسبشن ..

كدة الدنيا حواليكي رايقة وهادية .. محتاجة تنضيف بس انتي كدة نفسيا أهدى والدنيا رايقة حواليكي ومنظمة الى حد كبير .

هاتحسي انك عندك طاقة تبدأي في الشغل الثقيل ..وهاتقولي لنفسك الله .. ما الدنيا حلوة اهي

ادخلي على المطبخ اعملي قهوتك الصباحية أو الشاي بتاعك ووطي البوتجاز ولمي رخامة المطبخ وانتي مستنية القهوة تتعمل ولمعيها ورصي مواعين الصبح بنظام في الحوض او في الغسالة لو عندك -طبعا مفترض ان مافيش مواعين من بليل – بس عادي نفوتهالك المرة دي. .