كلام ستات وشوية تكات
كتبت / عزه السيد
كلام مهم ومعلومات ونصائح مفيده لك ولمطبخك
▪ضعي بيكنج بودر علي عجينة الكفته المشوية ، وابقي ادهني ايدك بمية البصل وانت بتصبعيها علي السيخ .. روعه .
▪ تبلي دقيق السمك بملح وفلفل وكمون وشطة ونشا وبيكنج بودر ..
وقبل القلي غطسيه في ميه وارفعيه بسرعه أو بالبخاخه ترشي عليه الميه وضعيه مباشرة في طاسة التحمير .
▪ العيش الفينو قبل ماتعمليه سندوتشات شيلي القلب واقطعي الحروف وحمصيهم واطحنيهم ..
وبعدين ضيفي عليهم توم بودر وبصل بودر وبابريكا وملح وفلفل ونشا وبيكنج بودر .. للبانيه والفراخ المقرمشة.
▪ الباذنجان المخلل ضيفي قليل من النعناع الناشف مع التوم.
▪ البشاميل ضيفي جبنه مثلثات او كريمي وقشطة وجبن رومي مبشورة و٣ ملاعق مايونيز ..
وعلي الوش موتزريلا .
▪ الملوخيه ملعقة سكر وشوية كاتشب او ملعقة صلصة .
▪ملعقة سكر في صلصة المكرونة.
▪ قشر الليمون او الفانيليا في زيت قلي السمك .
▪ نقع البانيه في لبن او زبادى .
▪ الشاورما اللحمة والحواوشي ضيفي لهم قطعة ليه مقطعه.
▪ البطاطس قبل ماتحمريها اسلقيها عشر دقائق في ميه وملح بتقرمش ومش بتشرب زيت .
▪ قشر الليمون مش ترميه خليه عالحوض بعد ماتغسلي المواعين ادعكي بيه ايديك..
بيشيل السمار من صابون المواعين وبينعم الايد .
▪ رشة لبن بودرة علي وش البشاميل .
▪ محشي الكرنب سخني حته زبدة وقشطة وحطيه عليه وغطي الحله قبل ما يستوي .
▪ ملعقة خل في الكيك .
▪ القليل من العسل في تتبيلة الفراخ المشوية.
▪زبادي في تتبيلة البانيه .
▪ البتنجان المحمر خلليله وهو سخن واقفلي عليه العلبه.
▪ ملعقة بيكنج بودر في الشوربة اللي هتسقي بيها الرقاق باللحمه .. هيبقي مقرمش ومورق .
▪البطاطا المشوية اعمليها في الكيس الحراري ورشي عليها قليل من السكر ودخليها الفرن .
▪ ادعكي الفراخ ببصلة وملح وفلفل قبل السلق يديها طعم.
▪ لما تشربي القهوة مترميش التفل ده سكرب هائل لبشرتك.
▪ اكياس الشاي مترميهاش سقعيها في الثلاجه وحطيها علي عينك واعملي بها كمادات لعلاج اجهاد العين .
▪ الرز باللبن ضيفي كيس كريم شانتيه .
▪ رشي دقيق علي بصل الكشري قبل التحمير يجعله مقرمش.
▪ سفن اب او ميرندا الكيك هتخليه هش جدا.
▪ رشة زعتر علي صلصة المكرونه .
▪لفي الليمون في ورق جرائد قبل حفظه في الثلاجة.
