أمينة السيد الأولي على الثانوية الأزهرية للمكفوفين….قصة كفاح تمشي على رجلين
متابعة/ هاني حسبو.
البنت الجميلة اللي قدامك دي أمنية السيد، الأولى على الثانوية الأزهرية للمكفوفين، وجابت 98%.
كانوا رايحين يعملوا معاها لقاء، وكل الناس واقفة بتباركلها وفرحانة بيها… لكن في لحظة صغيرة محدش يمكن ياخد باله منها، أنا وقفت عندها.
أمنية كانت قاعدة ومش عارفة تبص لفين، لأنها ببساطة مش بتشوف 😌.
أمها لاحظت ده على طول، استأذنت ثواني، راحت قعدت جنبها وقالتلها بكل حنية : “بصي هنا يا أمنية.”
الكلمة كانت عادية… لكن معناها كان كبير. أمنية دموعها نزلت من غير ما تحس، وأبوها قام وباس راسها في مشهد عمره ما هيتنسي.
وبصراحة… لما تشوف بنت ربنا ابتلاها بفقدان البصر، ومع ذلك قدرت تبقى الأولى على الجمهورية بـ98%، تعرف إن كلمة “مفيش مستحيل” دي مش مجرد شعار.
وساعتها افتكرت أي حد بيقعد يشتكي من ضغوطات الحياة على أتفه الأسباب… والله الضغوطات الحقيقية هي اللي عاشتها البنت دي، ومع ذلك انتصرت ونجحت ومش كده وبس دي طلعت الاولي .
أمنية السيد دي مش مجرد طالبة متفوقة… دي قصة نجاح تمشي على رجلين، ونموذج يخلينا كلنا نفتخر.
و اللي عملته يستاهل يتحكي والناس تتكلم عنها ، وتتكرم عليه ألف مرة، لأن دي الناس اللي تشرف اي حد.
مختارة من مواقع التواصل الاجتماعي.
