كلام ستات وشوية تكات.. الملوخية
كتبت / عزه السيد
“زمان كانت الملوخية الناشفة أساس في البيوت
وكان ليها ريحة تملأ الشارع كله مش بس البيت
والسر كله كان في الطريقة… مش أي كلام وخلاص
تعالوا أقولكم على طريقة أمهاتنا وجداتنا بالظبط
أول حاجة
تجيبي شوية ثوم مفروم فريش + شوية كزبرة
وتشوحيهم في الحلة اللي هتعملي فيها الملوخية
أول ما التوم يصفر على طول
تنزلي عليهم بـ طمطمايتين متقطعين قطع صغيرة
وتسيبيهم يسبكوا مع بعض كويس
بعد كده
تنزلي بالشوربة (شوربة فراخ بلدي أو لحمة أو بط على حسب المتوفر)
وتسيبيها تغلي غلوة واحدة بس
وبعدها مباشرة
تنزلي بالملوخية الناشفة
وتديها غلوتين مع التسبيكة بس… مش أكتر
وبعدين تيجي بقى أهم خطوة
باقي كمية الثوم اللي قسمتيها
تعمليها طشة مع كزبرة ناشفة متحمصة طازة
وتنزلي بيها على الملوخية
هنا بقى…
هتشمي أحلى ريحة ملوخية ناشفة بطعم وريحة زمان
ويا سلام بقى لو الطشة دي
ما تكونش بسمنة عادية
جربيها بمعلقة سمنة بلدي
أو دهن أو لية بلدي الله الله الله
هتديكي طعم وريحة في حتة تانية خالص
هي دي الملوخية الصح…
ببساطة زمان وأصوله .
وبالف هنا
