كلام ستات وشوية تكات
كتبت /عزه السيد
لو بتحبي الطبخ والتنظيف وعايزة أكلك يفرّق وطعمه يبقى ملوش حل تعالي هقولك علي شوية نصايح هتخليكي ست بيت شاطره
–ضيفى رشة سكر بسيطة على اي صلصة بتوازن الحموضة وتظبط الطعم
–امسحي الرخامة بالخل بيطهرها وبيساعد في التنظيف السريع بعد التجهيز.
– متكثريش البهارات، خلي الطعم الأصلي للمكونات هو الأساس عشان طعم الاكل يبان
–رشي الفلفل الأسود على البصل وهو نص تحميرة الريحة هتجيب آخر الشارع.
–سر البركة ابدئي أكلك ببسم الله، البركة والخير هيزيدوا في كل نقطة.
– نضفي أولاً بأول وأنتِ شغاله تخلصي الأكل وتلاقي مطبخك فلة ونفسيتك مرتاحة
– متقلبيش خليط الكيك كتير بعد إضافة السوايل عشان يطلع هش وخفيف وميكتمش.
–ضيفي معلقة نشا صغيرة مع شوية مية مغلية ورشة ملح وانتِ بتسلقي البطاطس نص سلقة قبل القلي، أو مع تتبيلة الفراخ والبانيه.. هتطلع معاكي مقرمشة دهبي ومبتشربش ولا نقطة زيت.
– بعد ما تخلصي طبخ، اغلي شوية ميا في حله فيها قشور ليمون أو برتقال مع عود قرفة وفصين حبهان هتسحب أي ريحة زفارة أو تقلية وهتقلب ريحة البيت كله انتعاش وراحة
–معلقة سمنة مع نقطة زيت للرز،بتدي لمعة وطعم والرز بيطلع مفلفل
–دايما استخدمي الخضار الطازة بيكون ليه طعم مختلف وفايدة أكثر
–ضيفي رشة زعتر جاف على صلصة البيتزا أو المكرونة بتعمل نكهة ولا أروع.
– هدي النار على الأكل وسيبيه يستوي براحته الفرق في الطعم هتلاحظيه بنفسك
–ضيفي رشة فانيليا صغيرة على عصائر الفاكهة بتدي ريحة منعشة وجميلة.
–نظفي براد الشاي بكربوناتو وخل وسيبيه يغلي.. هيرجع يلمع زي الجديد.
– ابدئي بالمطبخ الأول، ولما تخلصيه باقي البيت هيسهل عليكي.
–شغلي إذاعة القرآن الكريم وأنتِ بتطبخي هتحسي بهدوء وطمأنينة ملهاش مثيل.
– خلي الذكر دايمًا على لسانك، ربنا يبارك في بيتك وصحتك ورزقك.
