كلام ستات وشوية تكات
كتبت / عزه السيد
كلام ستات وشوية تكات
تعالي اقولك شويه نصايح يا تخليكي زوجة نشيطة وشطورة.
لو الشوربة زادت فى الملوخية وطلعت خفيفة حطيها في مصفى ضيقة هينزل جزء من الشوربه ورجعي الملوخيه اللي في المصفى على باقي الحله او حطى شوية ملوخية ناشفه ومن الأفضل تضيفى الشوربة بالتدريج على الملوخية
عملتي كيك ووشها احترق منك متزعليش حلها سهل رشي عليها سكر بودر ودخليها الفرن تحت الشواية لمدة 5 دقائق ودوقي احلي طعم
وانتي بتقلي السمك ضيفي شوية نشا وبيكينج بودر مع الدقيق هتخليه مقرمش
لأزالة روائح الاكل من مطبخك هاتي كوباية ميه وحطيها في اناء علي النار وضيفي عليهم شوية فانيليا وسيبها تغلي وشمي احلي ريحة في مطبخك
لو عاوزة تحتفظي بالليمون للموسم كله … حطيه في كيس في الفريزر وهيفضل زي مهو وعند الاستخدام خرجي الليمون وتحت الميه علطول هيرجع اكنه طازج
لحفظ الخيار لفترة اطول في الثلاجة يلف في ورق ثم يوضع في كيس بلاستيك محكم الغلق
استخدمي فرشاة الاسنان لتنظيف مبشرة الجبن أو المصفاة السلكية
لو رخامة مطبخك تحولت من الأبيض للأصفر … ادعكيها بعصير الليمون والملح واغسليها بالمياه وهيرجع للونه الأصلي
لازالة بقع القهوة من اي مكان بالمطبخ يتم أزالتها بأضافة قليل من النشادر مع ماء الغسيل ثم تشطف وتجف جيدا
عند تنظيف أناء الخلاط حطي شوية مية ونقطة صابون اطباق وشغلي الخلاط شوية وشوفي النتيجة بنفسك
عند تنظيف سيراميك المطبخ يذاب قليل من الخل الأبيض وقطرات من الليمون والكحول النقي في ماء فاتر ويلمع به.
