اليوم العالمي للمرأة.. الرجل بين أربع جبهات
بقلم التربوي / الشيخ محمد عرفة البهادي
الراجل يفضل يسلك ف خناقات أمه ومراته، دي تقول له امك مش طايقانى، وأمه تقول له مراتك بتقول لي صباح الخير من تحت الضرس.. ويفضل يقول لمراته معلهش اعتبريها زي أمك، ويقول لأمه معلهش اعتبريها زي بنتك، ومراته تتهمه أنه ابن أمه، وأمه تتهمه أنه دلدول
يكبر في السن شوية، وجوازه يقدم شوية، يبتدي يفض الخناقات اللي بين مراته وبنته، ومراته تتهمه أنه مش ناشف معاها والمفروض يشد عليها، ويبطل يدلعها.. وبنته تتهمه أنه مش بينصفها وبييجي مع أمها، رغم إنها ماغلطتش وأمها عايزة تفرض عليها تصاحب مين وتلبس ايه، وهي مابتعملش حاجة غلط.. وهو يفضل رايح جاي بين الاتنين.. معلهش يا حبيبتي بلاش تكبتيها وسيبها تتنفس شوية.. معلهش يا حبيبة بابا ماما خايفة عليكي وحاولي تراضيها وماتعانديهاش.
يكبر في السن شوية كمان، ويعجز، يبتدي يفض الخناقات اللي بين مراته ومرات ابنه، مراته تتهمه أنه بيحابي مرات ابنه وأنه أعمى مابيشوفش هي ازاي مسيطرة ع الواد وعايزة تخطفه منهم ويبقى بتاعها لوحدها وتعبهم وشقاهم في تربيته يروحوا في الهوا، ومرات ابنه تشتكيله.. يا عمو أنا مش غلطانة.. طنط هي اللي عايزة تلغي شخصيتي.. وزعلت لما طلعنا اتعشينا بره امبارح ورحنا قعدنا شوية عند مامتي واتأخرنا.. حقنا يا عمو.. وهو على نغمة واحدة.. معلهش يا حاجة اعتبريها زي بنتك ودول شباب لازم يعيشوا حياتهم.. معلهش يا بنتي حقك عليا عيشوا واتبسطوا وحماتك عمرها ما هتكره لك الخير.. بس أنتي صالحيها وهي قلبها أبيض وبتحبك زي بنتنا بالظبط.
ييجي بقى اليوم العالمي للولية، تلاقي الأربعة (أمه، ومراته، وبنته، ومراة ابنه) يتجمعوا في بوست واحد، ويقلبوا نسويات والراجل قاهرهم وبتاع، وهاتك: الله يا حبيبتشي.. قمر يا حبيبتشي.. كل سنة وانتى عسولة يا حبيبتشي.. قطيعة تقطع الرجالة يا حبيبتشي.
