كتبت / عزه السيد ما تشبعيش جوزك وولادك وانتي لأ. ما تدلّعيش جوزك وتدّيله صدر الفرخة، وابنك تدّيله الورك، وانتي تكتفي بالفتافيت اللي فضلت من الفرخة. ما تقوليش: «هدومي لسه حلوة، مش لازم أجيب» ولا: «أنا يعني بروح فين؟» ولا: «المهم هما يلبسوا ويتبسطوا ويأكلوا». ما تخليش بيتك يعلّمك إنك آخر القائمة وإن كل اللي حواليكي أولى منك بكل حاجة. بالعكس… انتي مش خدامة، ولا ضِلّ في البيت ده، ولا كائن بيعيش على الهامش. انتي روح البيت. انتي اللي لو وقعتي البيت كله يقع بعدك. من كتر ما لمعتي جوزك هييجي عليه يوم وينساكي. ومن كتر ما دلّعتي ابنك هيفتكر إنك اتخلقتي عشان تخدميه وبس. انتي علّمتيهم ياخدوا… بس نسيتي تعلّميهم يدو. نسيتي تعلّميهم إن انتي كمان ليكي حق. إن انتي كمان تستاهلي. الراجل اللي يتعود ياخد أحسن حاجة ويسيبك بالبواقي مش غصب عنه… ده اتربّى على كده. وابن اتربّى إن أمه آخر واحدة بيكبر وهو شايف ده طبيعي. ما ترضيش بالبواقي لا في الأكل، ولا في الاهتمام، ولا في الحنية. البواقي مش بس أكل… البواقي شعور. البواقي نظرة. البواقي كلمة مبتتقالش. والبواقي دي هتفضل وراكي لحد ما تصحي في يوم تلاقي نفسك عايشة على فتافيت حب، وفتافيت راحة، وفتافيت نفس كانت بتستاهل تعيش. اعملي لنفسك طبق. واشتري الفاكهة اللي بتحبيها. والبسي هدوم حلوة مش أقل من اللي حواليكي. اطلعي معاهم السِّلَّمة والطريق خطوة بخطوة. اكوي نفسك قبل ما تكوي هدومهم. دلّعي روحك قبل ما تدلّعيهم. اهتمي بنفسك مش عشان الغرور… عشان الكل يعرف إنك ليكي دور، وليكي حياة، وليكي قيمة. خلي الراجل يفهم إنك شريكة مش خدامة. وخلي الولاد يعرفوا إن الأم مش آخر حد ياخد. وإفتكري دايمًا: اللي بيرضى بالبواقي بيتحوّل في يوم من الأيام لباقي. الست اللي ما تحطّش نفسها أولًا العيلة كلها بتحطّها آخرًا… واللي يخسر نفسه عشان يرضي الكل بيصحى يوم يلاقي إن محدش راضي عنه
