كلام ستات وشوية تكات

كتبت/ عزه السيد

كلام مهم وشوية معلومات هتنفعك جدا في مطبخك

— لو الشوربة زادت فى الملوخية وطلعت خفيفة حطيها في مصفى ضيقة هينزل جزء من الشوربه ورجعي الملوخيه اللي في المصفى على باقي الحله ومن الأفضل تضيفى الشوربة بالتدريج على الملوخية.

— عملتي كيك ووشها اتحرق منك حلها سهل شيلي الطبقه المحروقة ورشي علي وشها سكر بودر ودخليها الفرن تحت الشواية لمدة 5 دقائق

— وانتي بتقلي السمك ضيفي شوية نشا وبيكينج بودر مع الدقيق هتخليه مقرمش

— لأزالة روائح الاكل من مطبخك هاتي كوباية ميه وحطيها في اناء علي النار وضيفي عليهم شوية فانيليا وسيبها تغلي وشمي احلي ريحة في مطبخك

— لو عاوزة تحتفظي بالليمون للموسم كله حطيه في كيس في الفريزر وهيفضل زي مهو وعند الاستخدام خرجي الليمون وتحت الميه علطول هيرجع اكنه طازج

— لحفظ الخيار لفترة اطول في الثلاجة يلف في ورق ثم يوضع في كيس بلاستيك محكم الغلق

— استخدمي فرشاة الاسنان لتنظيف مبشرة الجبن أو المصفاة السلكية

— لو رخامة مطبخك تحولت من الأبيض للأصفر ادعكيها بعصير الليمون والملح واغسليها بالمياه وهيرجع للونه الأصلي.