الست المصرية الجدعة.. سر البركة في كل بيت
كتبت / عزه السيد
مهما كانت الظروف، الست المصرية دايمًا تعرف تدبر أمورها وتطلع من أقل الإمكانيات أحسن نتيجة، وعمرها ما بتستسلم ولا بتسيب حاجة تضيع من إيديها.
شطورة في بيتك
الفاكهة اللي بدأت تدبل؟ تتحول لمربى أو عصير لذيذ يفرح العيلة.
والخيار اللي فقد قرمشته؟ شوية مية بملح يرجع كأنه لسه متشال من السوق.
اللبن لو فصل؟ بدل ما يترمي نعمل منه جبنة بلدي .
وحتى الشرش له استخدامات كتير في المخبوزات والعجين ويضيف طعم مميز.
البطاطس المسلوقة ممكن تتحول لأحلى كفتة أو أقراص بطاطس يحبها الكبار قبل الصغيرين.
ولو الأسعار غليت، الست الشاطرة تعرف تبدّل وتغيّر وتعمل أكل يفتح النفس بأبسط المكونات.
ونص كيلو اللحمة ممكن يتقسم على أكتر من أكلة، يدي نكهة حلوة ويوفر في المصروف من غير ما نحس بأي نقص.
رغيف بلدي مع طعمية سخنة وكوباية شاي أوقات بيكونوا أجمل من سفرة مليانة أصناف.
وأكلة بسيطة معمولة بحب ورضا، جنبها شوية مخلل وخضار، بتبقى عندنا بألف وليمة.
إحنا شعب بيعرف يعيش ويرضى ويشكر ربنا على نعمه، وده سر البركة اللي بنشوفها في بيوتنا مهما كانت الإمكانيات.
