كلام ستات وشوية تكات
كتبت / عزه السيد
كلام مهم لست البيت الشاطره ،لو نفسك ميزانية البيت تكفي آخر الشهر من غير ضغط… تعالي أقولك يا زوجة نشيطة وشطورة. على شوية أفكار بسيطة بتفرق بجد مع أي ست بيت شاطرة
الدهنة البلدي متستهونيش بالدهنة اللي بتكون في اللحمة، اجمعيها أول بأول في الفريزر، ولما تتجمع كمية مناسبة سيحيها على نار هادئة وصفيها، وهيبقى عندك سمنة بلدي تساعدك في الطبيخ وتوفر معاكي كتير.
البصل الجاهز لما البصل يكون سعره مناسب هاتي كمية، افرميها واحفظيها في أكياس صغيرة في الفريزر. وقت الطبخ هتوفر عليكي وقت ومجهود وكمان هتقلل الهدر.
الثوم حضري كمية ثوم مرة واحدة واحفظيها في التلاجة أو الفريزر، ووقت الاستخدام خدي الكمية اللي تحتاجيها بس.
الكفتة الاقتصادية ممكن تزودي كمية الكفتة بإضافة شوية عيش منقوع ومتصفى مع البصل والتوابل، والطعم يفضل جميل والكمية تكفي أكتر.
الطماطم لما تكون الطماطم رخيصة اعملي عصير طماطم واحفظيه، وهيوفر معاكي وقت وفلوس خصوصًا في الطبيخ اليومي.
البرجر البيتي اعملي كمية واحفظيها جاهزة في الفريزر، وهتبقى وجبة سريعة وقت الزحمة بدل طلبات الدليفري.
البشاميل الاقتصادي ممكن تعمليه بمزيج من اللبن والشوربة مع الدقيق والسمنة، وبيطلع بطعم جميل ويوفر في التكلفة.
بديل الكريمة لو محتاجة كريمة ومش متوفرة، في بدائل منزلية بسيطة تنفع لكثير من الوصفات وتعطي نتيجة حلوة.
الرز البايت متترميهوش، احفظيه ولما تحتاجيه سخنيه على البخار وهيرجع طري كأنه لسه معمول.
المكرونة البايتة حوليها لوجبة جديدة بإضافة جبنة أو خضار ودخليها الفرن، وهتتفاجئي بالنتيجة.
الشوربة الزيادة احفظيها في الفريزر واستخدميها بعد كده في المحشي أو الملوخية أو أي طبيخ، هتدي نكهة أحلى بكتير من الميه العادية.
