كلام ستات وشوية تكات
كتبت / عزه السيد
كلام جميل ومفيد جدا لست البيت
لما تقطفى الملوخية خدى حتة من العرش معاكى وزى ما تفقنا سيبى الباب موارب وتبقى رشى عليها رشة بيكنج بودر بتخليها ما تسودش وبالهنا والشفا ياعسل .
لما تعجنى رقاق حطى ع الدقيق معلقة بيكنج بودر بيخلية هش ومش معجن .
لما تيجى تحشى ممبار هاتى زجاجة مياة صغيرة وقصى بوزها من قدام واحشى بية هتحشى الممبار فى وقت قياسى ولما تيجى تسوية يغلى غلوة واحدة ووطى علية النار عشان ما يفرقعش ربنا ما يفرقعلك مرارة .
لما تعملى عيش بالحمة تبقى قطعى ورقة نعناع على الخلطة بتعمل نكهه حلوة اوووى .
ما تحطيش الملح ع السلطة غير ع التقديم ويسلام لو رشة خل وفص توم .
شوية نظافة بقا
وانتى بتاخدى شاور ادعكى الحمام معاكى بالمرة ما انتى كدة كدة مبلولة بس اوعى تتزحلقى .
وانتى بتغلسى وشك الصبح اغسلى الحوض معاكى هيبقى فلة .
لمى الغياريين بتوعك وبتوع عيالك واغسليهم يوم بيوم صدقينى هتحسى بإنشكاح لما تلاقى باسكت الغسيل فاضى.
جهزى بخاخة فيها دوا نمل ولما تلاقى نملة اقتلى امها عشان تحرم تدخل بيوت الناس من غير استأذان
حضرى باسكت فاضى للعب العيال وزينية وعلميهم يلموا اللعب لما يخلصوا بدل ما صوتك جايب اخر الشارع
ما تنسيش نفسك فى زحمة اليوم خلى لنفسك وقت دلعى نفسك فية
بخاخة فيها معطر وبوخى بخة كل شوية افتحى نفس الراجل لما يجى يلاقى ريحة البيت حلوة زيك كدة
قبل اما تنامى روقى شقتك وشطبى مطبخك ياااااة ع الراحة النفسية تصدقى انا ارتحت.
