كلام ستات وشوية تكات
كتبت عزه السيد
خليكي ناصحة وست بيت شاطرة واعملي كدة .
لما تيجي تسلقي الفرخه ابشري بصله وحطي عليها ملح وفلفل اسود وادعكي بيهم الفرخه من بره وجوه وبعدين حطيها تتسلق هتلاقي طعمها تحفه ومفيهاش ريحة زفارة.
لما تيجي تقلي بطاطس لو عايزاها مقرمشه انقعيها في ميه وملح وخل قبل ما تعمليها بساعتين علي الاقل هتطلع مقرمشة وجميله.
الرز عشان يبقي مفلفل وميعجنش قلبيه في السمنه او الزيت كتير يتشوح افضلي قلبي فيه لحد ما كل حبة رز تتغلف بالمادة الدهنيه وبعدين ضيفي الميه والملح.
وانتي بتغسلي وشك الصبح شوية صابون في ايدك وسلك مخصص للحمام ونضفي الحوض ورشي مطهر ع الارض وشوية ميه وشديه بالمساحه هيبقي زي الفل.
متركنيش الغسيل خالص اغسلي حتي كل يومين مش هتزهقي وهتخلصي بسرعه.
بعد ما تخلصي المواعين هاتي الفوط اللي بتمسكي بيها الحلل واغسليها بصابون و كلوروعلقيها هتبقي نضيفه لما تيجي تستخدميها تاني.
قبل ماتنشري الغسيل اكنسي البلكونه ولمعيها بالشرشوبة علي السريع هتفضل دايما نضيفه.
قبل ماتنامي ادهني وشك زيت زيتون وبعدين اشطفيه بماء فاتر وحطي ماء ورد هتلاقي وشك منور.
متاخريش صلاتك ابدا اول ماتسمعي الاذان تسيبي اي حاجه في ايديكي وصلي علي طول
وخلي ليكي كل يوم ورد من القرآن قبل ماتنامي هتحسي براحه ونفسيتك هتبقي احسن.
